చిత్రం: పెళ్లి సందD; నటీనటులు: రోషన్, శ్రీలీల, ప్రకాశ్రాజ్, రాజేంద్ర ప్రసాద్, రావు రమేష్, తనికెళ్ల భరణి, పోసాని కృష్ణ మురళి, వెన్నెల కిషోర్, సత్యం రాజేష్, రాజీవ్ కనకాల, శ్రీనివాస్ రెడ్డి, శకలక శంకర్, అన్నపూర్ణ, జాన్సి, ప్రగతి, హేమ, కౌముది, భద్రం, కిరీటి తదితరులు; సంగీతం: ఎం.ఎం.కీరవాణి; సినిమాటోగ్రఫీ: సునీల్ కుమార్ నామ; ఎడిటర్: తమ్మిరాజు; ఎగ్జిక్యూటివ్ ప్రొడ్యూసర్: సాయిబాబా కోవెలమూడి; నిర్మాతలు: మాధవి కోవెలమూడి, శోభు యార్లగడ్డ, ప్రసాద్ దేవినేని; దర్శకత్వ పర్యవేక్షణ: కె.రాఘవేంద్రరావు బి.ఎ; దర్శకత్వం: గౌరీ రోణంకి; విడుదల: 15-10-2021
ఈసారి దసరాకి అసలు సిసలు సినిమా సందడి కనిపించింది. మూడు కీలకమైన సినిమాలు ప్రేక్షకుల ముందుకు వచ్చాయి. అందులో ఒకటి… పెళ్లిసందD. పాతికేళ్ల కిందటి ‘పెళ్లి సందడి’ హీరో శ్రీకాంత్ తనయుడు రోషన్ ఇందులో కథానాయకుడిగా నటించడం… అప్పటి సినిమాకి దర్శకత్వం వహించిన కె.రాఘవేంద్రరావు నేటి సినిమాకి దర్శకత్వ పర్యవేక్షణ చేయడం, ఆయన ఓ కీలక పాత్రలో కూడా నటించడం ఈ సినిమా ప్రత్యేకం. మరి ఈ నయా సందడి ఎలా ఉంది? పాతికేళ్ల కిందట తండ్రి శ్రీకాంత్ చేసిన సందడిని తనయుడు రోషన్ పునరావృతం చేశాడా?
కథేంటంటే: వశిష్ట (రోషన్) బాస్కెట్ బాల్ ప్లేయర్. ఒక పెళ్ళిలో సహస్ర (శ్రీలీల)ని చూసి మనసు పడతాడు. ఆమె కూడా ఇష్టపడుతుంది. కానీ సహస్ర సోదరి (వితిక షేరు) తీసుకున్న ఓ నిర్ణయం ఆ ప్రేమికులు ఇద్దరినీ దూరం చేస్తుంది. తన అక్క జీవితం కోసం తండ్రి (ప్రకాష్ రాజ్)కి ఓ మాట ఇస్తుంది సహస్ర. ఇంతకీ ఆ మాట ఏమిటి? కలిసి బతకాలనుకున్న వశిష్ట… సహస్ర మధ్య బంధం ఏమయ్యింది? వాళ్ళ ఇద్దరి కథ ఎలా ఎవరి ద్వారా బయటకి వచ్చింది? తదితర విషయాలు తెలియాలంటే సినిమా చూడాల్సిందే.
ఎలా ఉందంటే: పెళ్లి నేపథ్యంలో సాగే కథ ఇది. అందుకే ‘పెళ్లి సందD’ అయ్యింది. అంతే తప్ప అప్పటి సినిమాకి.. ఈ కథకీ ఎలాంటి సంబంధం లేదు. మాయ (శివాని రాజశేఖర్) అనే ఓ దర్శకురాలు ధ్యాన్ చంద్ అవార్డు గ్రహీత అయిన వశిష్ట బయోపిక్ తీయాలని అనుకుంటుంది. ఎవరికీ తెలియని ఆయన స్టోరీ తెలుసుకునేందుకు మాయ తండ్రి (రాజేంద్రప్రసాద్) రంగంలోకి దిగుతాడు. అక్కడినుంచి మొదలవుతుందీ సినిమా. కాలం చెల్లిన కథతో ఈ నయా పెళ్లిసందD తెరకెక్కింది. కథలోనే కాదు, కథనం పరంగా కూడా ఎలాంటి కొత్తదనం కనిపించదు. రాఘవేంద్ర రావు – కీరవాణి మార్క్ పాటలు, చిత్రీకరణ తప్ప ఇందులో చెప్పుకోవాల్సిన విషయాలు ఏమీ లేవు. పాత కథని అంతే పాత పద్ధతుల్లో తెరకెక్కించారు. ఫ్యామిలీ స్టోరీ అనుకున్నప్పుడు ఫ్యామిలీని కట్టిపడేసే బంధాలు అనుబంధాలు తెరపై కనిపించాలి. రొమాంటిక్ స్టోరీ అనుకున్నప్పుడు ప్రధాన జోడీ మధ్య ప్రేమ, రొమాన్స్ కనిపించాలి. కానీ ఈ సినిమాలో అవేవీ పండలేదు. నువ్వంటే నాకు, మాయ నగరిలో… పాటలు అందులో కథానాయిక అందం ఆకట్టుకుంటోంది.
ఎవరెలా చేశారంటే: నాయికానాయకుల జోడీ చూడ్డానికి ఫ్రెష్గా ఉంది. ఇద్దరి మధ్య ముఖ్యంగా పాటల్లో మంచి కెమిస్ట్రీ కనిపించింది. పాత్రల్లో అందం లేకపోవడంతో సన్నివేశాలు తేలిపోయాయి. భావోద్వేగాలు పండలేదు. రాఘవేంద్రరావు తొలిసారి తెరపై కనిపించారు. అంతే తప్ప ఆ పాత్రపై పెద్దగా ప్రభావం చూపించలేదు. పరిశ్రమలో ఉన్న ప్రధాన తారాగణం తెరపై కనిపించిది. కానీ ప్రభావం అంతంత మాత్రమే. సాంకేతికంగా విభాగంలో సంగీతం, నృత్య దర్శకత్వం ప్రధాన పాత్ర పోషించింది. మిగిలిన విభాగాలన్నే తేలిపోయాయి.
బలాలు
+ పాటలు
+ నాయిక నాయకుల జోడీ
+ పతాక సన్నివేశాలు
బలహీనతలు
– కథ, కథనం
– ప్రథమార్ధం, భావోద్వేగాలు పండకపోవటం
చివరిగా: పెద్దగా సందD లేదు!